गीता अमूल्य ज्ञान जो ख़ज़ानो

श्रीमद्भगवत गीता कहिं ब हिक ज़ाती या धर्म जे लाए न पर दुनिया जे हर हिक जीव खे पढ़हण ऐं ॿुधण घुरजे; गीता ज्ञान जो अद्भुत ख़ज़ानो आहे। गीता चवे थी त असां खे ज़िन्दगी न त रुअण लाए ऐं हालतुनि खां परे भॼण लाए, न त खिलण लाए ऐं न ई रांद रूंद करण लाए मिली आहे। गीता मां ॾुखयाई जे वक्त ते हिमथ सां मुकाबलो करण जी प्रेरणा मिलंदी आहे। गीता मनुष्य जी ज़िन्दगीअ में हर पल अचण वारियुनि नंढी वॾियुनि ॻाल्हयुनि जो मुकाबलो हिमथ सां करण जी शक्ती ॾींदी आहे। गीता में 18 अध्याय ऐं 700 श्लोक आहिन जेको हर हिक लाए पढ़हण संभव कोन आहे, पर गीता परिवार जे करे इहो संभव थी सघियो आहे।
गीता परिवार सां असां घर वेठे गीता जो पाठ करे चइन धामि जी यात्रा जो आनंद वठी सघूं था। गीता यात्रा कंदे कंदे हू (योगेश्वर श्रीकृष्ण) पहिंजे कहिं न कहिं धाम में हाजिरी लॻाराए थो। काम, क्रोध, लोभ ऐं मोह जहिड़ा विकार ब दूर थी वञनि था ऐं अंदर हिक शांतीअ जो अनुभव थिए थो। जेकॾहिं असांखे का चिंता सताए थी या निराश आहियूं त गीता मां ज्ञान रूपी हिक किरण मिलंदी आहे। कष्टनि जे विच में हिक छंद या श्लोक पढ़हण सां मन खे शांती महसूस थींदी आहे। अॼु असां गीता खे ॻाड़्हे कपड़े में वकोड़े रखी उनखे मान ॾींदा आहियूं पर उनजो असली मान तॾहिं थींदो जॾहिं असां उनखे पढ़हंदासीं ऐं जीवन में आणींदासीं। पर हिक सचु इहो ब आहे त कहिंखे गीता पढ़हण लाए चऊं था त कलयुग जो असर हुअण करे हू चवनि था त असांखे वक्त ई कोन आहे या चवनि था त गीता पढ़हण सां माण्हू संन्यासी थी वेंदो आहे, पर अर्जुन गृहस्थ जीवन जीअण वारो हो ऐं हुन युद्ध ब कयो। त हुन जहिड़े जिम्मेदार माण्हूअ टाइम कडियो त तव्हां ऐं असां छो न।
ज़िन्दगीअ में कहिं ब फैसले ते अचण खां पहरीं असां गीता जो ज्ञान समझूं त असां हमेशह कामयाब थींदासीं ऐं पोइ कहिं ब ॻाल्ह लाए असांखे पछताइणो कोन पवंदो। त अचो असां सब ब गीता मैया जो सच में सम्मान करे पढ़हूं ऐं उनजे अमूल्य खज़ाने खे ॼाणी करे वधीक फायदो वठी करे अहिड़ी ज़िन्दगी जियूं जहिंजो मतलब ब हुजे ऐं भॻवान श्रीकृष्ण जा ब प्रिय थी रहूं। अचो गीता परिवार सां गॾजी हिन महान यज्ञ में पहिंजो योगदान ॾेई पहिंजो जीवन सफल बणायूं ऐं कहिं न कहिं सेवा में ज़रूर भाॻु वठूं।

पूर्वी वालेचा
रायपुर